(ಇದು ಐರಿಷ್ ತಾಯಿಯೊಬ್ಬಾಕೆ ತನ್ನ ಮಗನಿಗೆ ಬರೆದ ಪತ್ರದ ಪ್ರತಿಯಂತೆ. ನನ್ನ ಗೆಳತಿಗೆ ಬಂದ ಫಾರ್ವರ್ಡನ್ನು ಆಕೆ ನನಗೆ ತುಂಬ ದಿನದ ಹಿಂದೆ ಫಾರ್ವರ್ಡ್ ಮಾಡಿದ್ದಳು. ಅದನ್ನು ಕನ್ನಡೀಕರಿಸಿ ಇಲ್ಲಿರಿಸಿದ್ದೇನೆ. ನೀವೂ ಓದಿ ಎಂಜಾಯ್ ಮಾಡಿ!!)
ಪ್ರೀತಿಯ ಮಗನೇ...
ನಾನಿನ್ನೂ ಬದುಕಿದ್ದೇನೆ ಎಂದು ತಿಳಿಸಲು ಕೆಲವು ಸಾಲುಗಳನ್ನು ಇಲ್ಲಿ ಬರೆಯುತ್ತಿದ್ದೇನೆ. ನಾವೆಲ್ಲರೂ ಇಲ್ಲಿ ಚೆನ್ನಾಗಿದ್ದೇವೆ. ನಾನು ಈ ಪತ್ರವನ್ನು ತುಂಬಾ ನಿಧಾನವಾಗಿ ಬರೆಯುತ್ತಿದ್ದೇನೆ. ಏಕೆಂದರೆ, ನಿನಗೆ ವೇಗವಾಗಿ ಓದಲು ಆಗದು ಎಂಬುದು ನನಗೆ ಚೆನ್ನಾಗಿ ತಿಳಿದಿದೆ.
ನಾವೀಗ ಮನೆ ಬದಲಾಯಿಸಿದ್ದೇವೆ. ನೀನು ಮನೆಗೆ ಬಂದಾಗ ನಮ್ಮ ಹೊಸಮನೆಯನ್ನು ಗುರುತಿಸಲಾರೆ. ‘ನಿಮ್ಮ ಮನೆಯ 20 ಕಿ.ಮೀ ಅಂತರದಲ್ಲಿ ಹೆಚ್ಚಿನ ಅಪಘಾತಗಳು ಸಂಭವಿಸುತ್ತವೆ’ ಎಂಬುದನ್ನು ನಿನ್ನ ತಂದೆ ಪತ್ರಿಕೆಯಲ್ಲಿ ಓದಿದ್ದಾರೆ. ಹಾಗಾಗಿ ಇದರಿಂದ ಪಾರಾಗಲು ನಾವು ಮನೆ ಬದಲಾಯಿಸಿದೆವು. ನಾನೀಗ ನಮ್ಮ ಹೊಸ ಮನೆಯ ವಿಳಾಸವನ್ನು ನಿನಗೆ ನೀಡಲು ಸಾಧ್ಯವಾಗುತ್ತಿಲ್ಲ. ಏಕೆಂದರೆ, ಇಲ್ಲಿ ವಾಸವಾಗಿದ್ದ ಐರಿಷ್ ಕುಟುಂಬವು ಬೇರೆ ನಿವಾಸಕ್ಕೆ ತೆರಳುವಾಗ ಈ ಮನೆಯ ನಂಬ್ರ ಹಾಗೂ ವಿಳಾಸವನ್ನು ತಮ್ಮ ಜತೆಗೇ ಒಯ್ದಿದೆ. ಹಾಗಾಗಿ ಅವರು ತಮ್ಮ ಹೊಸ ವಾಸ್ತವ್ಯದಲ್ಲಿ ತಮ್ಮ ವಿಳಾಸವನ್ನು ಬದಲಿಸುವ ಅಗತ್ಯವಿಲ್ಲವಂತೆ.
ನಮ್ಮ ಈಗಿನ ಹೊಸ ಮನೆ ನಿಜವಾಗಿಯೂ ಚೆನ್ನಾಗಿದೆ. ಇಲ್ಲಿ ನಮಗೆ ವಾಷಿಂಗ್ ಮೆಷಿನ್ ಸಹ ಇದೆ. ಅದು ಚೆನ್ನಾಗಿ ಕೆಲಸಮಾಡುತ್ತದೆಯೇ ಎಂಬುದನ್ನು ನನಗೆ ಹೇಳಲಾಗುತ್ತಿಲ್ಲ. ಕಳೆದ ವಾರ ಒಂದು ಲೋಡ್ ಬಟ್ಟೆ ಹಾಕಿ ಚೈನ್ ಎಳೆದೆ. ಆ ಬಳಿಕ ಅದು ಕಾಣುತ್ತಲೇ ಇಲ್ಲ.
ನಿನ್ನ ತಂದೆಗೆ ಇಲ್ಲೀಗ ಉತ್ತಮವಾದ ಉದ್ಯೋಗ ದೊರೆತಿದೆ. ಹಾಲಿ ಅವರ ಕೆಳಗೆ 500 ಮಂದಿ ಇದ್ದಾರೆ. ಅವರಿಗೆ ಸ್ಮಶಾನದಲ್ಲಿ ಹುಲ್ಲು ಕತ್ತರಿಸುವ ಕೆಲಸ.
ನಿನ್ನ ಸಹೋದರಿ ಮೇರಿ ಇಂದು ಮುಂಜಾನೆ ಮಗುವೊಂದಕ್ಕೆ ಜನ್ಮ ನೀಡಿದ್ದಾಳೆ. ಆದರೆ ಅದು ಹೆಣ್ಣೋ ಅಥವಾ ಗಂಡೋ ಎಂಬುದು ನನಗೆ ತಿಳಿದಿಲ್ಲದ ಕಾರಣ ನೀನು ಆಂಟಿಯೋ ಇಲ್ಲ ಅಂಕಲ್ಲೋ ಎಂಬುದಾಗಿ ನನಗೆ ಹೇಳಲಾಗುತ್ತಿಲ್ಲ.
ಕಳೆದವಾರ ನಿನ್ನ ಚಿಕ್ಕಪ್ಪ ಪ್ಯಾಟ್ರಿಕ್ ಡಬ್ಲಿನ್ ಬ್ರಿವರಿಯ ವಿಸ್ಕಿಯ ಕೊಳಗದಲ್ಲಿ ಮುಳುಗಿದ್ದರು. ಅವರ ಕೆಲವು ಸಹೋದ್ಯೋಗಿಗಳು ಅವರನ್ನು ಉಳಿಸಲು ಪ್ರಯತ್ನಿಸಿದರಾದರೂ, ಅವರೊಂದಿಗೆ ದಿಟ್ಟತನದಿಂದ ಹೋರಾಡಿದ ಚಿಕ್ಕಪ್ಪ ವೀರ ಮರಣವನ್ನಪ್ಪಿದ್ದಾರೆ. ಫ್ಯಾಕ್ಟರಿಯವರು ಶವಸಂಸ್ಕಾರ ಮಾಡಿದ್ದು, ಬೆಂಕಿ ನಂದಲು ಮೂರು ದಿವಸ ತಗುಲಿತು.
ನಿನ್ನ ಕಸಿನ್ ಸೀಮಸ್ ಬೈಕ್ ಚಲಾಯಿಸುತ್ತಿದ್ದಾಗ ಆತನನ್ನು ಬಂಧಿಸಲಾಗಿದೆ ಎಂಬುದು ವಿಷಾದನೀಯ ವಿಚಾರ. ಆತನ ಮೇಲೆ ಮಾದಕ ದ್ರವ್ಯ ಸಾಗಾಟದ ಆಪಾದನೆ ಹೊರಿಸಲಾಗಿದೆ.
ಗುರುವಾರ ನಾನು ವೈದ್ಯರನ್ನು ಕಾಣಲು ಹೋಗಿದ್ದೆ. ನಿನ್ನ ತಂದೆಯೂ ನನ್ನೊಂದಿಗಿದ್ದರು. ವೈದ್ಯರು ನನ್ನ ಬಾಯಿಗೊಂದು ಚಿಕ್ಕ ಟ್ಯೂಬ್ ಹಾಕಿ ಹತ್ತು ನಿಮಿಷ ಮಾತನಾಡಬಾರದೆಂದರು. ಆ ಟ್ಯೂಬ್ ಖರೀದಿಸಲು ನಿನ್ನ ತಂದೆ ಉತ್ಸಾಹ ತೋರಿದರು.
ಇಲ್ಲಿನ ಹವಾಮಾನವು ಕೆಟ್ಟದಾಗೇನೂ ಇಲ್ಲ. ವಾರದಲ್ಲಿ ಬರಿಯ ಎರಡು ಸರ್ತಿಮಾತ್ರ ಮಳೆಯಾಗಿದೆ. ಮೊದಲಿಗೆ ವಾರದ ಮೊದಲಿನ ಮೂರುದಿನ ಮಳೆ ಸುರಿದರೆ, ಬಳಿಕ ನಂತರದ ನಾಲ್ಕುದಿನ ಮಳೆ ಸುರಿಯಿತು. ಸೋಮವಾರ ಇಲ್ಲಿ ಬಲವಾದ ಗಾಳಿ ಬೀಸಿದ್ದು, ಕೋಳಿಯೊಂದು ಒಂದೇ ತತ್ತಿಯನ್ನು ನಾಲ್ಕು ಬಾರಿ ಇಟ್ಟಿತು.
ನೀನು ಕಳುಹಿಸಬೇಕು ಎಂದು ಹೇಳಿದ್ದ ಕೋಟ್ ಕಳುಹಿಸಿದ್ದೇವೆ. ಅಂಚೆಯಲ್ಲಿ ಕಳುಹಿಸುವ ವೇಳೆ ಕೋಟಿನಲ್ಲಿ ಬಟನ್ ಇದ್ದರೆ, ಅದು ತುಂಬ ಭಾರವಾಗುತ್ತದೆ ಎಂಬುದಾಗಿ ನಿನ್ನ ಸ್ಟಾನ್ಲಿ ಅಂಕಲ್ ಹೇಳಿದರು. ಹಾಗಾಗಿ ನಾವು ಬಟನ್ಗಳನ್ನು ಕತ್ತರಿಸಿ ಅದರ ಕಿಸೆಯಲ್ಲಿ ಇರಿಸಿದ್ದೇವೆ.
ನಿನ್ನೆ ಜಾನ್ ಕಾರಿನ ಕೀಯನ್ನು ಕಾರಿನೊಳಗೇ ಬಿಟ್ಟಿದ್ದ. ಇದರಿಂದಾಗಿ ನಾನು ಮತ್ತು ನಿನ್ನ ತಂದೆ ಕಾರಿನೊಳಗೇ ಬಂಧಿಯಾದೆವು. ಆತನಿಗೆ ಕಾರಿನ ಬಾಗಿಲು ತೆರೆದು ನಮ್ಮನ್ನು ಹೊರತರಲು ಸುಮಾರು ಎರಡು ಗಂಟೆ ತಗುಲಿತು. ಇದು ನಮಗೆ ನಿಜವಾಗಿಯೂ ಆತಂಕ ಉಂಟುಮಾಡಿತ್ತು.
ಟ್ರಕ್ಕಿನಲ್ಲಿ ಸಾಗುತ್ತಿದ್ದ ನಿನ್ನ ಮೂವರು ಸ್ನೇಹಿತರು ನಿನ್ನೆ ಸೇತುವೆಯಿಂದ ಕೆಳಕ್ಕುರುಳಿದ್ದಾರೆ. ರಾಲ್ಫ್ ಗಾಡಿ ಚಲಾಯಿಸುತ್ತಿದ್ದ. ಆತ ಕಿಟಿಕಿ ಮೂಲಕ ಹೊರಬಂದು ಈಜಿ ಸುರಕ್ಷಿತವಾಗಿ ದಡ ಸೇರಿದ್ದಾನೆ. ಇನ್ನಿಬ್ಬರು ಸ್ನೇಹಿತರು ಹಿಂದೆ ಕುಳಿತಿದ್ದರು. ಅವರಿಬ್ಬರಿಗೆ ಕಿಟಿಕಿ ಪತ್ತೆ ಮಾಡಲು ಸಾಧ್ಯವಾಗದ ಕಾರಣ ಅವರು ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ್ದಾರೆ ಎಂದು ತಿಳಿಸಲು ನನಗೆ ದುಃಖವಾಗುತ್ತಿದೆ.
ಇನ್ನು ಹೆಚ್ಚೇನು ವೀಶೇಷವಿಲ್ಲ. ಈ ಸರ್ತಿ ಇಲ್ಲಿ ಹೆಚ್ಚೇನೂ ಸಂಭವಿಸಿಲ್ಲದ ಕಾರಣ ತುಂಬ ಬರೆಯಲು ಏನಿಲ್ಲ.
ಇತೀ ಆಶೀರ್ವಾದಗಳೊಂದಿಗೆ,
ನಿನ್ನ ಪ್ರೀತಿಯ ತಾಯಿ.
ವಿ.ಸೂ: ನಾನು ನಿನಗೆ ಸ್ವಲ್ಪ ಹಣವನ್ನು ಕಳುಹಿಸಬೇಕೆಂದಿದ್ದೆ. ಆದರೆ ನಾನು ಇದೀಗಾಗಲೇ ಲಕೋಟೆಯನ್ನು ಮುಚ್ಚಿಬಿಟ್ಟಿದ್ದೇನೆ, ಕ್ಷಮಿಸು.